Швед матбуоти: Обидхон қорига суиқасдда гумонланган шахс ‘қўлга олинди’

Яқинларининг айтишича, Обидхон қори кома ҳолатидан чиққан ва соғлиги яхши томонга ўзгара бошлаган

Швеция матбуотига кўра, таниқли ўзбек имоми Обидхон қори Назаров жонига қасд қилишга уринишда гумонланган шахс бир неча кун муқаддам Россияда қўлга олинган.

Хабарларда айтилишича, ушбу шахс Швеция полицияси рўйхатида бўлган телефон аппаратидан қўнғироқ қилган пайти Россия хавфсизлик хизмати томонидан ушланган.

‘Ижобий ўзгариш’

Обидхон қори Назаровнинг ўғли Довудхон отасининг ҳаётига суиқасдда гумон қилинган шахснинг ҳибсга олингани ҳақидаги хабарни жума куни эрталаб швед матбоутидан олишгани ва бу оилалари учун “хурсандчилик хабари” бўлганини айтди.

Унинг Би-би-си билан суҳбатда айтишича, швед ҳуқуқ-тартибот идоралари Обидхон қорининг оиласини гумондорнинг ушлангани ҳақида хали расман хабардор қилишмаган.

Швед полицияси қотиллик уринишидан кўп ўтмай, гумондорнинг шахсни аниқлаган ва уни халқаро қидирувга берган.

Гумондорнинг Россияда яширинаётгани айтилганди.

Довудхоннинг айтишича, 8 ойдан буён шифохонада оғир аҳволда қолаётгани айтилган Обидхон қорининг аҳволи ҳозирда “ижобий томонга ўзгара бошлаган”.

“Дадам кома ҳолатидан чиқдилар ва ҳозирда шифокорларнинг умидлари қатъийлаша бошлади”, – деб айтди Довудхон Обидхон ўғли Би-би-си билан суҳбатда.

ББС радиоси.